Qırımda yañı koronavirus yuqunçı telükesi sebebinden 2691 insan tibbiy közetüv altında buluna, soñki künde 327 insan közetüvden çıqarıldı.
Bu aqta Qırımnıñ Rusiye Sağlıq naziriniñ muavini Anton Lâskovskiy koronavirus yuqunçınıñ tarqaluvına qarşı operativ ştab toplaşuvında ayttı.
Onıñ bildirgenine köre, 2480 kişi evde közetüv altında buluna, 50 insan hastahanede ve 161 kişi observatorda qala.
«32-siniñ testi müsbet çıqtı, 12 hasta hastahaneden çıqarıldı. Bugünki künde ağır hastalar yoq», – dep qoştı memur.
Aprelniñ 12-nde Qırımda 32 koronavirus hastası bar edi. 2973 insan közetüv altında bulundı. Aqyarda altı insan hastalandı, dördü tüzeldi.
Qırımnıñ Rusiye akimiyeti bildirgenine köre, aprelniñ 14-nden başlap koronavirus sebebinden özüni izolâtsiya etüv rejimi sertleştirilecek.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
