Qırımtatar Milliy Meclisiniñ reis muavini, Ukraina halq deputatı Ahtem Çiygoz dünyadaki koronavirus pandemiyası ve Rusiye işğal etken Qırımda yüz bergen vaziyet sebebinden qırımlılarğa muracaat etti.
«İşğalci memuriy sıñırnı qanunsız kontrol etken vaziyette Qırımdaki Ukraina vatandaşlarımız telükede qala. Ukrainada kerekli tedbirler alına – cemiyetniñ qoruvsız qısmına yardım etmek içün göñülli areketleri teşkil etile, iş adamları pandemiyağa qarşı küreşke faal sürette qoşula, hastahaneler içün donatmalar ve ekimler içün kerekli imaye vastaları satın alına», – dep yazdı Çiygoz Facebook saifesinde.
Onıñ qayd etkenine köre, bu areketler işğal etilgen Qırım yarımadasında yapılamay, amma koronavirus tarqalğanda Rusiye kontrolindeki Qırım akimiyeti bir şey yapmasa, «dünya cemaatçılığınıñ tesir usullarını qullanacaq», dep vade etti.
«Eñ az qorçalanğan insanlarğa qoltutmaq içün tedbir almañızğa, ve pandemiyanıñ tarqaluvına qarşı eñ semereli vasta olaraq özüni tecrit etmeñizge çağıram. Qırım Muhtar Cumhuriyetinde pandemiyanen bağlı malümat bermeñizni rica etem. Sizge qoltutuv imkânlarını qıdıracaqmız, pandemiyanıñ tarqaluvına qarşı alınacaq tedbir ve usullarnı sizge bildirecekmiz», – dep bildirdi Meclis reisiniñ muavini.
Hatırlatamız, Qırımda ve Aqyarda 417 insan koronavirus şübhesinen tibbiy nezaret altında qala.
Qırımda ilk koronavirus hastası bar dep tasdıqladılar.
Martnıñ 19-nda Qırımdaki Rospotrebnadzor idaresi, yarımadanıñ tibbiy müessiselerinde «telükeli memleketlerden keskin virus yuqunçı alâmetlerinen» 18 insan buluna, dep bildirgen edi.
Qırımda koronavirus şübhesi ile evde nezaret altında bulunğan insanlarnıñ sayısı arttı. Qırımnıñ Rusiye sağlıq naziri İgor Çemodanovnıñ malümatına köre, ekimler 286 insannıñ alını kontrol ete, 22 insan hastahanelerde buluna.
Aqyarda martnıñ 21-nde 11 hasta infektsion hastahanede tibbiy nezaret altında buluna, 123 insan evde nezaret altında qala.
