Qırımda tünevin 66, Aqyarda ise 65 yañı koronavirus hastası qayd etildi. Bunı Rusiyeniñ nezaretinde olğan Qırım ve Aqyar başlıqları haber ete.
Qırımda künde tüzelgenlerniñ sayısı 56, bütün müddet içinde ise 119 047. Bir künde10 hasta vefat etti, pandemiya başlanğandan berli ise 4 518.
Aqyarda 85 hasta tüzelgen soñ hastahaneden çıqarıldı. 75 yaşından 90 yaşına qadar 5 adam vefat etti. Pandemiya başlanğandan berli 532 hasta tüzeldi, 1 873 vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
