Keriçte koronavirus infektsiyası sebebinden özüni izolâtsiya etüv rejiminiñ qaideleri sertleşkeni içün politsiya taqımları çoqlaştı. Qırım.Aqiqat mühbiri bildirgeni kibi, Rusiye politsiyasınıñ ve Rosgvardiyanıñ hadimleri soqaqlarnı patrul ete, piyadeler ve aydavcılarnen subetler keçire.
Bunıñnen beraber Keriçniñ merkeziy bazarı da patrul etile.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
