İtaliyada soñki kün devamında koronavirus sebebinden peyda olğan COVID-19 hastalığından 427 insan can berdi, dep bildire Azatlıq Radiosı.
Böylece, qurbanlarnıñ sayısı 3405 insan oldı. Bu raqam 3249 ölüm qayd etilgen Qıtaydan yüksek oldı.
İtaliyada koronavirusqa oğrağan 41 000-den çoq insan qayd etildi, 4440 kişi tedaviylendi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi. O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tedaviylene; çoqusı allarda immunitet sisteması zayıf olğan insanlar, hususan qartlar vefat ete.
ABDdeki Johns Hopkins Universiteti yanındaki koronavirus malümatı merkeziniñ malümatına köre, dünyada martnıñ 19-na qadar 235 000 insan koronavirustan hasta oldı. 9785 kişi can berdi, aman-aman 85 000 tedaviylendi.
