Büyük Britaniya baş naziri Boris Johnson intensiv tedaviy odasına alındı. Onıñ sağlıq vaziyeti fenalaştı, ekimler onı suniy nefes cihazlarına yaqınca tutmağa qarar berdi, dep bildire «Nastoyaşçeye Vremâ».
Baş nazir vazifesini Johnson Yerine Tış işler naziri Dominic Raab eda etecek.
Boris Johnsonnıñ hastahanege alınğanı aqqında bazarertesi künü belli oldı.
Britaniya baş naziriniñ koronavirusqa oğrağanı martnıñ 27-nde belli oldı. Johnson «hafif alâmetleri» bar olğanından göñülli olaraq karantinge ketmege qarar aldı.
Johnson 55 yaşında, hastalıq onıñ içün o qadar telükeli olmamalı. Faqat onıñ nişanlısı ağır ayaqlı ve koronavirus balası içün telüke ola bile.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
