Aqyarda yılnıñ başından 1084 insan yañı koronavirus yuqunçına oğradı, 26-sı soñki künde hastalandı. Bu aqta şeerniñ Rusiye ükümeti bildire.
Yañı hastalar – 10 yaşından 80 yaşına qadar insanlar, episi – yerli sakin. 9 kişi tüzelgen soñ hastahaneden yiberildi. Al-azırda 321 insan hastahanede buluna. 688 kişi yahşı oldı, 29 insan vefat etti.
Bugünki künde 259 insan yuqunç hastahanesinde buluna, 222 kişi №9 şeer hastahanesinde közetile. 428 kişi yaşağan yerde közetile.
Qırımda oktâbrniñ 2-nde 100 yañı koronavirus hastası qayd etildi. Bir hasta vefat etti.
Sentâbrniñ 30-nda Qırım ve Aqyardaki Rospotrebnadzor idaresi yarımadada koronavirus hastalarınıñ sayısı artqanı içün cemaat naqliyatında maska taquv qaidelerini sertleştirmege çağırdı. Müessise, aydavcılarnıñ maskasız çalışmasını yasaq etmege teklif etti.
Keçken künü Qırımda 98 koronavirus hastası qayd etildi. Umumen, yerli akimiyetniñ malümatına köre, Qırımda 4755 yañı koronavirus hastası qayd etildi. 2894 insan tüzeldi. 66 kişi koronavirustan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
