Aqyarda mayısnıñ 22-nde saba bir COVID-19 hastası qayd etildi.
Bu aqta Rusiye kontrolindeki Aqyar ükümetiniñ matbuat hızmeti bildire.
«İnsan daa evel hastalanğanlarnen alâqada oldı. Yılnıñ başından Aqyarda 149 kişi koronavirus yuqunçına oğradı. 105 insan tüzeldi, 2 kişi vefat etti», – dep aytıla haberde.
Akimiyetniñ malümatına köre, bugünki künde 86 insan yuqunç hastahanesinde közetüv altında qala, №9 şeer hastahanesinde – 69 kişi. 597 insan yaşağan yerinde közetile.
«İzumrud» pansionatı observator rejiminde çalışmağa devam ete.
Qırımda mayısnıñ 22-nde 10 yañı koronavirus hastası qayd etildi. Qırımnıñ Rusiye akimiyeti malümatına köre, bugünge qadar 324 yañı koronavirus hastası qayd etildi. 25-i çetelden keldi, 32-si Rusiyeden keldi. 130 kişi tüzeldi, 9 koronavirus hastası vefat etti. Aqyarda 148 yañı koronavirus hastası qayd etildi, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
