Aqyarda yanvarnıñ 26 sabası itibarınen 102 yañı koronavirus hastası qayd etildi. 65 yaştan 94 yaşqa qadar beş kişi öldi. Bu aqta Rusiye nezaretinde olğan şeer memuriyetiniñ matbuat hızmeti haber ete.
“Pandemiya başlağanından berli Aqyarda koronavirusnen episi olıp 9207 kişi hastalanğan, 8311 tedaviylengen ve 371 ölgen. Bugünde, COVID-19 diagnozı tasdıqlanğan 337 insan hastahanelerde yata, alı yengil hastalar bölüginde 127 kişi buluna” – dep yazıla bildirmede.
Daa 660 kişi közetile, olarda COVID-19 diagnozı tasdıqlanmağan.
1742 insanğa COVID-19 aşısı yapıldı, 560 kişi ekinci kere aşı oldı, şimdi oca ve tibbiyet hadimleri aşılana.
Hatırlatamız ki, Qırımda keçken künü 157 yañı koronavirus hastası qayd etildi, aynı zamanda 7-niñ hastalıq alâmetleri yoq edi. Bir künde koronavirus yuqunçından 9 hasta öldi, pandemiya başlanğandan berli ise 720 adam.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
