Noyabrniñ 24-nde saba Aqyarda 55 yañı COVID-19 hastası qayd etildi, dep bildire şeerniñ Rusiye ükümeti.
Berilgen malümatqa köre, 21 hasta yuqunç ve doquzıncı şeer hastahanesine alındı, qalğanları ambulator tedaviylevde buluna.
«Hastalar – 14 yaşından 89 yaşına qadar yerli sakinler. 83 insan tüzelgen soñ çıqarıldı. 56, 61, 73 ve 83 yaşlarında dört insan vefat etti», – dep aytıla haberde.
Umumen yılnıñ başından Aqyarda 3980 insan yañı koronavirus yuqunçına oğradı, 3375 kişi tüzeldi, 106 insan vefat etti.
COVID-19 diagnozı tasdıqlanğan 242 insan hastahanelerde buluna, 231 kişi ambulator tedaviylevde qala, 578 kişi közetile.
Qırımda keçken künü 184 koronavirus hastası qayd etildi. Aqyarda yılnıñ başından 3925 insan koronavirus yuqunçına oğradı, 3292 kişi tüzeldi, 102 insan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
