Oktâbrniñ 2-si sabasına Aqyarda 25 yañı COVID-19 hastası qayd etildi, dep bildire şeerniñ Rusiye ükümeti.
«Hastalar – 13 yaşından 82 yaşına qadar insanlar, episi – yerli sakinler. 50 yaşında er adamı vefat etti. Ağır eki taraflı virus pnevmoniyası oldı, yürek-damar sistemasınıñ hronik hastalıqları sebebinden aqcigerleri, miyi şişti», – dep aytıla haberde.
Akimiyetniñ malümatına köre, al-azırda 305 insan hastahanelerde buluna, 241 kişi yuqunç hastahanesinde közetile, 213 insan №9 şeer hastahanesinde qala. 507 insan yaşağan yerde közetile.
Yılnıñ başından Aqyarda 1058 insan yañı koronavirus yuqunçına oğradı. 679 insan tüzeldi, 29 kişi vefat etti.
Keçken künü Qırımda 98 koronavirus hastası qayd etildi. Umumen, yerli akimiyetniñ malümatına köre, Qırımda 4755 yañı koronavirus hastası qayd etildi. 2894 insan tüzeldi. 66 kişi koronavirustan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
