Aqyarda martnıñ 20-nde 83 insan evde tibbiy nezaret altında buluna, daa 10 hasta COVID-19 şübhesi olğan hastalar içün esas tibbiy müessise olaraq belgilengen şeer infektsion hastahanesinde qala.
Rusiye kontrolindeki Aqyar ükümetiniñ sağlıq departamenti bildirgenine köre, şeerde tasdıqlanğan koronavirus hastaları qayd etilmedi.
Müessise, Aqyar sağlıq müessiselerinde hadimler içün bir kerelik maska, qolçaq ve yuqunç ile küreş vastalarınıñ yedegi yapıldı, dep qayd etti.
Bir kün evelsi departament evde 78 insan, daa 8 hasta şeer infektsion hastahanesinde buluna, dep bildirdi.
Qırımnıñ Rusiye sağlıq naziri İgor Çemodanovnıñ bildirgenine köre, işğal etilgen Qırımda 212 insan ekimlerniñ nezareti altında, 16 kişi izolâtorda buluna.
Qırımdaki Rospotrebnadzor idaresiniñ malümatına köre, martnıñ 19-na qadar monitoring devamında 1183 insan yañı koronavirus yuqunçı (COVID-19) talilinden keçti.
Koronavirus yuqunçı tarqaluvınıñ ögüni almaq içün işğal etilgen Qırımda ve Aqyarda «yüksek azırlıq» rejimi kirsetildi.
Qırımnıñ Rusiye yolbaşçısı Aksenovnıñ bildirgenine köre, Qırımda koronavirus hastaları qayd etilmedi.
Qırımda martnıñ 17-nden başlap sport, eglence ve diger kütleviy tedbirlerniñ keçirilüvi yasaqlana. Aqyarda martnıñ 19-ndan başlap bütün mektepler qapatıla, aliy oquv yurtları ise martnıñ 16-nda uzaqtan tasilge keçti.
