Aqyarda keçken künü 76 yañı koronavirus hastası qayd etildi, 58 ve 86 yaşında eki insan vefat etti, dep haber ete şeerniñ Rusiye ükümeti.
«Umumen Aqyarda 15 787 insan yañı koronavirus yuqunçına oğradı. 14 294 insan yahşı oldı, 712 kişi vefat etti. 390 insan közetile – olar hastalarnen alâqada oldı, amma COVID-19 diagnozı tasdıqlanmadı», – dep aytıla haberde.
Hatırlatamız, iyünniñ 21-nde Aqyarda 71 yañı COVID-19 hastası qayd etildi, bir insan vefat etti.
Rusiye kontrolindeki Aqyar yolbaşçısınıñ muavini Aleksandr Kulagin keçken afta Aqyarda koronavirus hastalarınıñ sayısı 70% arttı, dep bildirgen edi.
Aqyarnıñ Rusiye valisi Mihail Razvojayev şeer musafirhanelerine tek aşı yapqan ya da koronavirus yuqunçını keçirgenine dair vesiqası olğan musafirlerni qabul etmege teklif etti.
Aqyarda cemaat naqliyatında maska rejimine riayet etüv kontroli sertleştirildi.
Aqyar akimiyeti şeerniñ yuqunç hastahanesi 80% tolu, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
