İşğal altındaki Aqyarda iyün ayından başlap üç yaşından yedi yaşına qadar balalarğa er ay nefaqa bermege vade eteler. Nefaqa almaq içün arizalar iyünniñ 1-nden itibaren qabul etilecek. Aqyar sakinleri tek ariza bermeli, qalğan vesiqalarnı içtimaiy qoruv organları toplaycaq.
Bu aqta Aqyarnıñ Rusiye ükümetiniñ matbuat hızmeti bildire.
«Nefaqa 1 yılğa berilecek. Nefaqa miqdarı bala içün regional yaşayışı azğarınıñ 50%-ı olacaq. Aqyarda bu nefaqa 6 biñ 47 ruble olaraq berilecek. Er aylıq nefaqa bir insannıñ keliri keçken seneniñ 2-nci kvartalında bir insannıñ yaşayış azğarından çoq olmağan qorantalarğa berilecektir. Bugün bu 11 biñ 538 ruble ola», – dep aytıla haberde.
Qırımnıñ Rusiye parlamenti aprelniñ 6-nda üç yaşından yedi yaşına qadar balalarğa er ay nefaqa tölev qanun leyhasını qabul etti.
İşğal etilgen Qırımda da koronavirus pandemiyası sebebinden 2020 senesi iyünniñ 1-nden başlap 3 yaşından 7 yaşına qadar balalar içün er ay nefaqa berecegini vade ettiler.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
