Aqyarda aprelniñ 20-nde koronavirus telükesi sebebinden 94 insan yuqunç hastahanesinde közetüv altında buluna, 1666 kişi yaşağan yerinde közetile. Bu aqta Rusiye kontrolindeki Aqyar ükümetiniñ sağlıq departamenti bildire.
«COVID-19 diagnozı tasdıqlanğan 13 insan yuqunç hastahanesinde buluna, kerekli tibbiy yardım alalar. Yılnıñ başından berli Aqyarda 18 hasta qayd etildi, beşi tüzelgen soñ hastahaneden çıqarıldı», – dep aytıla haberde.
Aqyarnıñ Rusiye şeer yolbaşçısı vazifelerini eda etken Mihail Razvojayev eki yañı COVID-19 hastası aqqında bildirdi, bir yaşında bala hastalandı.
Qırımda 45 COVID-19 hastası bar. Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
