İşğal altındaki Aqyarda keçken künü 15 yaşından 88 yaşına qadar 10 yañı COVID-19 hastası qayd etildi. Bu aqta Kreml kontrolindeki şeer ükümetiniñ matbuat hızmeti bildirdi.
«Avgustnıñ 21-nde saba on yañı COVID-19 hastası qayd etildi. Bütün hastalar – 15 yaşından 88 yaşına qadar yerli sakinlerdir. Yahşı olğan daa dört kişi hastahaneden çıqarıldı. Umumen yılnıñ başından Aqyarda 450 insan yañı koronavirus yuqunçına oğradı», – dep aytıla haberde.
Hastahanelerde 73 insan buluna, 347 kişi tüzeldi, 15 insan vefat etti, dep qayd etile.
«Bugünki künde 166 insan yuqunç hastahanesinde közetile, №9 şeer hastahanesinde 146 kişi buluna. 228 insan yaşağan yerinde közetile. «İzumrud» ve «Solnışko» pansionatları observator rejiminde çalışa», – dep bildirdi matbuat hızmeti.
Aynı vaqıtta, işğal etilgen Qırımda avgustnıñ 21-nde yañı antirekord qayd etildi – bir künde 55 yañı koronavirus hastası, dep aytıla Rusiye kontrolindeki yarımada akimiyetiniñ malümatında.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
