Aqyarda iyünniñ 23-nde saba yedi yañı COVID-19 hastası qayd etildi. Eki hasta – №1 şeer hastahanesiniñ oftalmologik ve urologik bölükleriniñ hadimleridir.
Bu aqta Aqyarnıñ Rusiye ükümetiniñ matbuat hızmeti bildire.
«Al-azırda eki bölükte de hastalar çıqarılmay ve alınmay. Daa eki hasta yaqında hastalanğan qurucılarnen alâqada oldı. Bundan ğayrı, bir qoranta qayd etildi – bu künleri Çelâbinskten kelgen gençniñ tuvğanları hastalandı», – dep aytıla haberde.
Şeerniñ yuqunç hastahanesinde 109 insan, №9 şeer hastahanesinde 85 kişi közetile. 907 insan yaşağan yerinde közetile.
Yılnıñ başından Aqyarda 214 insan yañı koronavirus yuqunçına oğradı. Al-azırda 38 kişi hastahanede buluna. 166 insan yahşı oldı, 3 kişi vefat etti.
Keçken künü işğal etilgen Qırımda 10 yañı koronavirus hastası qayd etildi, bir COVID-19 hastası vefat etti.
Umumen Qırımda, akimiyetniñ malümatına köre, 623 yañı koronavirus hastası qayd etildi. 36-sı çetelden keldi, 93-ü qomşu Rusiyeden kelgenler ve olarnen alâqada olğanlar. 416 insan yahşı oldı, 21 kişi vefat etti. Aqyarda 207 insan yañı koronavirus yuqunçına oğradı, 3 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
