Rusiye kontrolindeki Qırım politsiyası içtimaiy ağlarda koronavirusnen bağlı derc etilgen blog içün yarımada sakinine para cezasını bermege istey. Müessise bu malümatnı «yañlış» dep adlandırdı.
Bu aqta aprelniñ 2-nde Qırımdaki Rusiye İç işler nazirliginiñ yolbaşçı muavini Aleksandr Smaglin koronavirus yuqunçınıñ tarqaluvına qarşı ştab toplaşuvında ayttı.
«Yañlış malümat bergen blog tapıldı. Tünevin bu şahıs tapıldı, protokol tizildi. Böyle cinayet içün vatandaşnı 30 biñden 100 biñ rublege qadar para cezası bekley. Malümat toplana ve mahkemege berilecek», – dep bildirdi Smaglin.
Rusiye kontrolindeki Qırım Sağlıq nazirliginiñ soñki malümatına köre, yarımadağa çetelden kelgen şahıslar arasında 3016 insan tibbiy közetüv altında buluna, olardan 2935-i evde dinamik közetüvde, 68 insan hastahanede ve 13 insan observatorlarğa tecrit etildi.
Martnıñ 31-nde saba Rusiye kontrolindeki Qırım yolbaşçısı Sergey Aksenov koronavirus yuqunçına oğrağan ekinci yerli insan tasdıqlandı, dep bildirdi. Böylece, Qırımda 16 kişi qayd etildi. Olardan 14-ü kelgenlerde, ekisi – yerli. Aqyarda 5 kişi koronavirusnen hastalandı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
