İşğal etilgen Aqyarnıñ aman-aman 70 biñ sakini koronavirus tarqaluvınen bağlı sıñırlavlar sebebinden belgilengen 3 biñ ruble para almaq içün ariza berdi. Bu aqta şeer ükümetiniñ matbuat hızmeti bildirdi.
«Tasil departamenti ilk kelgen 1 141 arizanı baqıp ödevge berdi… Al-azırda bir kerelik maddiy yardım almaq içün 68 biñ ariza berildi», – dep aytıla haberde.
Qırım.Aqiqatnıñ daa evel bildirgenine köre, Aqyarda çağına yetmegen balalar içün maddiy yardım almağa istegenler bank bölükleri ögünde nevbetlerge turdı.
Rusiye prezidenti Vladimir Putin 2020 senesi iyünniñ 1-nden itibaren 3 yaşından 7 yaşına qadar balalar içün er aylıq para bermege emir etti. Bu koronavirus pandemiyasınen bağlı vatandaşlarğa muracaat çerçivesinde aytıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
