Rusiye kontrolindeki Qırım yolbaşçısı Sergey Aksenov, Herson vilâyetiniñ memuriy sıñırından yarımadağa kirgen qırımlılar üzerindeki monitoringni quvetleştirmege talap ete. O, qırımlılarnıñ Ukraina biometrik pasportlarınen çetelge barğanını Rusiye sıñırcılarına bildirmesini istey.
Bu aqta o, martnıñ 20-nda koronavirus yuqunçınıñ tarqaluvına qarşı ştab toplaşuvında ayttı.
Memurlarnıñ toplaşuvda qayd etkenine köre, bir çoq qırımlı Ukraina biometrik pasportlarını qullanıp, çetel ziyaretlerini gizley.
«Sıñırda (Qırım ve Herson vilâyetiniñ memuriy sıñırında – QA) bugün vatandaşlarğa muracaat yerleştirmege rica etem, Ukraina çetel pasportınen çetelge barğanlar bunı bildirsin. Birisi barğanını gizlese ve hastalıqnı bizge ketirse, böyle insanlarnıñ cinaiy taqip etilüvini talap etecem. Sıñırda test neticelerini altı saat beklemek kerek», – dedi Aksenov.
Rusiye FSBsiniñ sıñır idaresi martnıñ 18-nde saat 00-dan başlap «çetel vatandaşlarını» esas Ukrainadan Qırımğa kirsetmey.
Qırımda martnıñ 17-nden başlap sport, eglence ve diger kütleviy tedbirlerniñ keçirilüvi yasaqlana. Aqyarda martnıñ 19-ndan başlap bütün mektepler qapatıla, aliy oquv yurtları ise martnıñ 16-nda uzaqtan tasilge keçti.
Qırımda koronavirus qayd etilgen memleketlerden kelgenler içün tevsiyeler çıqarıldı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
