Qıtay akimiyetiniñ fevralniñ 3-nde bildirgenine köre, yañı koronavirus neticesinde memlekette 361 insan öldi, 57 yañı hasta olğan kişi telüke merkezi olğan Hubey vilâyetinde qayd etildi, dep haber ete Azatlıq Radiosı.
Keçken aftanıñ soñunda hastalıqtan olğan ilk ölüm Qıtay tışında qayd etildi: Filippinlerde Uhandan kelgen er adam vefat etti.
Umumen dünyada 17 biñden çoq kişi hastalandı.
Hubey vilâyetinde akimiyeti 11 biñden çoq hastanı qayd etti.
Hubeyniñ vilâyeti Uhan şeerinde 1000 kişilik mahsus hastahane 10 kün içinde ve 1500 kişilik ekinci hastahane qurula, dep bildire AP.
Qıtay alimleri 2019 senesi dekabrniñ 31-nde adiy olmağan pnevmoniya aqqında ilk sefer bildirdi. Olar yañı koronavirusnı ayırıp, tolu genomını derc etti.
Ekimlerniñ bildirgenine köre, yañı koronavirus ağır pnevmoniyanıñ sebebi ola bile. Ayrı bir tedaviylevi yoq, tek alâmetleri yımşatıla bile. Ağır hastalıq immuniteti zayıf olğan insanlarda ve esli-başlılarda ola.
Dünya sağlıq teşkilâtı yañı koronavirusnı dünya seviyesinde fevqulâde vaziyet dep adlandırdı.
