Qıtay akimiyetiniñ fevralniñ 4-ünde bildirgenine köre, yañı 2019-nCoV koronavirusı neticesinde memlekette daa 64 adam öldi, böylece, bu hastalıqtan elâk olğanlarnıñ sayısı 425-kece arttı, dep haber ete Azatlıq Radiosı.
Qıtaynıñ reberligi, ülkeniñ yañı bir öldürici respirator virusına ilk reaktsiyası yañlış olğanını tanıdı. Fevralniñ 3-ünde Qıtay Kommunist partiyasınıñ siyasiy bürosınıñ Daimiy komiteti milliy fevqulâde vaziyet sistemasını yahşılaştırmaq kerek olğanını tanıdı.
"Bu epidemiya köstergen milliy fevqulâde vaziyet sistemasınıñ eksikliklerini yahşılaştırmaq kerekmiz", - bildirdi partiya yetekçilerine atıf etip Sinxua resmiy haber egentligi.
AFP haber ete ki, ükümet, tıp donatması ve cerrah maskalar, qoruyıcı urba ve közlükler acele kerek olğanını bildirdi.
Yanvarniñ 30-ında Bütündünya sağlıq teşkilâtı Qıtay koronavirusını global bir fevqulâde vaziyet dep ilân etti.
Qıtay alimleri 2019 senesi dekabrniñ 31-nde adiy olmağan pnevmoniya aqqında ilk sefer bildirdi. Olar yañı koronavirusnı ayırıp, tolu genomını derc etti.
Ekimlerniñ bildirgenine köre, yañı koronavirus ağır pnevmoniyanıñ sebebi ola bile. Ayrı bir tedaviylevi yoq, tek alâmetleri yımşatıla bile. Ağır hastalıq immuniteti zayıf olğan insanlarda ve esli-başlılarda ola.
Dünya sağlıq teşkilâtı yañı koronavirusnı dünya seviyesinde fevqulâde vaziyet dep adlandırdı.
