İşğal etilgen Qırımda gaz borusını patlatmağa tırışqanında qabaatlanğan erkek tutuldı, dep haber ete Baza Rusiye Telegram kanalı.
Kanal menbalarınıñ malümatına köre, erkek qabaatını tanıdı.
İyünniñ 23-nde berilgen malümatqa köre, Koreizde 500 abuneci gaz borusı zarar körgeninden gazsız qaldı. Rusiye akimiyeti zarar sebebini aydınlatmadı.
Berilgen malümatqa köre, iyülniñ 4-ne qadar FSB hadimleri «şübhelini» taptı. O, Ukrayınanıñ Pavlograd şeeriniñ 42 yaşında Sergey Yerjov ola. Yerjov Rusiye vatandaşlığını alıp, Yaltada qayd oldı. Oña qarşı mulkni yoq etüv maddesine istinaden dava açıldı, onı beş yılğa azatlıqtan marum ettiler.
Rusiye akimiyeti şübheli tutulğanını resmiy şekilde bildirmedi.
Martnıñ soñunda berilgen malümatqa köre, kimligi belli olmağan insanlar Aqmescitteki gaz borusını patlatmağa tırıştı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
