Ukraina prezidentiniñ Qırım Muhtar Cumhuriyetindeki daimiy vekili Anton Korınevıç Rusiye işğali sebebinden Qırım ve Aqyarda koronavirus pandemiyasınen bağlı vaziyet «pek qıyın», dep bildire.
Bu aqta o, aprelniñ 23-nde «Segodnâ» gazetasına bergen intervyüsında ayttı.
«Vaqtınca işğal etilgen Qırım ve Aqyardaki vaziyet yahşı degil, atta pek qıyın. Anda ilâc, qoruv vastaları ve testler yetmey. Bazı hastahaneler yuqunç bar şübhesinen qapatıla, Ermeni Bazarda ve Aqyarda öyle oldı. Qırım medeniy dünyadan ayrı qaldı. Rusiye işğali sebebinden Qırım çetelden test ve ilâc alıp olamay, çünki, şübhesiz, iç bir çetel memleketi bunı yapmaz», – dedi Korınevıç.
Onıñ qayd etkenine köre, yarımadağa yuqunç esasen qomşu Rusiyeden ketirile.
«Bir çoq insan virusnı Rusiyeden, meselâ, Moskvadan ketire. Vaziyet yaramay. Özüni izolâtsiya etüv rejimi ilân etildi. Bozğanlarğa büyük para cezaları berile. Qırım bundan evel de qapalı bir alan edi. Amma koronavirus pandemiyası sebebinden Qırım daa beter vaziyetke oğradı. Anda olğan vatandaşlarımız içün pek qasevetlenemiz», – dep qoşma prezident vekili.
Korınevıç emin ki, Rusiye akimiyeti yarımadada COVID-19 hastaları aqqında kerçek malümatnı gizley.
«Bu malümatnıñ kerçek olmağanını tahmin ete bilemiz, çünki iç bir halqara teşkilât ondan mesüliyetli degil, iç bir halqara közetici onı tasdıqlap olamay. Eminmiz ki, bir şeyler gizlene, vaziyet olğanı kibi aydınlatılmay», – dep qayd etti o.
Rusiye kontrolindeki Qırım yolbaşçısı Sergey Aksenov, Ukraina diplomatınıñ işğal etilgen Qırımda koronavirus tarqaluvınen bağlı zor vaziyetnen bağlı laflarını tenqit etti.
«Qırım aq qorçalayıcı gruppası» bildirgenine köre, aprelniñ 13-nden 19-na qadar işğal etilgen Qırımda ve Aqyarda resmiy şekilde qayd etilgen COVID-19 hastalarınıñs ayısı aman-aman eki qat arttı. Aq qorçalayıcılar, monitoring vaqtında elde etilgen malümat Rusiye akimiyeti derc etken resmiy raqamlarnıñ kerçek olmağanını köstere, dep bildire.
Böylece, Qırımda tasdıqlanğan 53 COVID-19 hastası bar. Aqyarda 25 koronavirus hastası qayd etildi. Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
