Qırımnıñ Rusiye akimiyeti, Qırımnıñ suv ve energetik qamaçavından ketirilgen zararnıñ miqdarı 14 trillion rubleden çoq olğanını iddia ete. Bunı Peterburg iqtisadiy forumında Rusiye kontrolindeki Qırım parlamentiniñ reisi Vladimir Konstantinov bildirdi, dep yaza Rusiye kütleviy haber vastaları.
"Suv qamaçavı — bu 7 trillion rubleden ziyade raqamdır. Energetik qamaçavnıñ yekünlenüv miqdarı da 7 trillion ruble ola bile, amma yañı zarar körgenler tapılğan soñ, bu miqdar arta bile", — dep bildire Konstantinovnıñ aytqanlarını RİA Novosti Krım.
Bundan da ğayrı, Konstantinov, Rusiye akimiyeti de "naqliyat ve aşayt qamaçavı"ndan "zararnı" esaplamağa niyetlene, dep bildirdi.
İyünniñ 7-nde Rusiye kontrolindeki Qırım Arbitraj mahkemesi Qırımnıñ Rusiye akimiyetiniñ energetik qamaçavı aqqında 3,15 trln rublelik davasını qanaatlendirdi. Bu dava Qırımnıñ Rusiye akimiyeti tarafından bu sene mart ayında açılğan edi. Konstantinov, bu para nasıl şekilde alınması planlaştırılğanını aytmadı. Ukrayina akimiyeti Qırımdaki Rusiye kontrolindeki mahkemelerniñ qararlarını tanımay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
