Rusiye kontrolindeki Qırım parlamentiniñ spikeri Vladimir Konstantinov emin ki, esas Ukrainada «qırımlılar taqip etile», «ruslar ise qorquda yaşay».
Bu aqta o, daa evel mahküm etilgen ve ABDden sürgün etilgen rusiyeli Mariya Butina ile körüşip ayttı. Rusiyede o, Cemaat palatasınıñ azası oldı.
«Qomşu devlet tarafından cinaiy taqip probleminen biñlernen qırımlı qarşılaştı. Tuvğanlarınen bağlanmağa imkânı olmağan ve apiste tutulğan semetdeşimizniñ sayısına dair malümat yoq. Ukrainada ruslar qorqup yaşay. İnsanlarımız içün küreşmek içün federal müessise ve qurulışlarnı celp etip, belli adımlar atmalı», – dep bildire Konstantinovnıñ aytqanlarını matbuat hızmeti.
Ukraina akimiyeti buña daa cevap bermedi.
Konstantinov, Dnipro suvı Qırımğa berilse, bu suvnı «zeerlemeleri» mümkün, dep qayd etti.
Bir yıl evelsi Rusiye kontrolindeki Qırımnıñ insan aqları vekâletlisi Larisa Opanasük bildirdi ki, Ukraina quvetçileri 41 qırımlını apiste tuta.
Ukraina Yuqarı Radasınıñ İnsan aqları vekâletlisi Lüdmila Denisovanıñ Kâtibiyeti bildirdi ki, 2020 senesi noyabr ayında Rusiye tarafından siyasiy sebeplerden taqip etilgen Ukraina vatandaşlarınıñ sayısı 130 oldı.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebepli taqip dep adlandıra. Rusiye akimiyeti taqiplerniñ bu sebeplerini inkâr ete.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
