Qırımnıñ Rusiye parlamentiniñ spikeri Vladimir Kostantinov Qırımdaki İvan Franko adına kitaphanesiniñ adınıñ deñiştirüv ğayesine qoltuttı. Bunıñ aqqında o, "VKontakte" içtimaiy ağındaki saifesinde yazdı.
Onıñ bildirgenine köre, kitaphaneniñ yañı adı içün rusiye yazıcıları Lev Tolstoy, Födor Dostoyevskiy, İvan Turgenev ve rusiye felsefecisi Nikolay Danilevskiyniñ adları teklif etile. Aynı zamanda soñki qarar daa alınmağan.
"Nazik meseledir, onı er taraflama tüşünecekmiz ve muzakere etecekmiz", - dedii o.
Qırımdaki kitaphanege ukrayin yazıcısı ve şairi İvan Frankonıñ adı 1956 senesi berilgen edi.
Aprelniñ 1-nde Qırımnıñ Rusiye yolbaşçısı Sergey Aksönov bildirdi ki, Qırımda yerli akimiyet meskün yerlerdeki bütün ukrayin timsallerinden qurtulmalıdır.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
