ABD Kongressi vekilleriniñ palatası Rusiyeniñ Qırım ilhaqını tanımağa yasaqlağan qanun leyhasına qoltuttı, dep bildirdi Ukrainanıñ ABD elçihanesi.
Vesiqada ABD federal departamentleri ve agentliklerine ABDniñ siyasetine zıt kele bilgen er angi areket yapmağa ve bir de bir destek köstermege yasaq etile, dep bildirdi elçihane.
Qanun leyhasına Kongress alt palatasınıñ 427 azası rey berdi.
Bundan evel ABD Kongressi Vekiller palatasınıñ tış işler komiteti ABD ükümetine Qırımnı qomşu Rusiyeniñ toprağı olaraq tanıycaq bir de bir areket yapmağa yasaqlağan qanun leyhasına bir ağızdan qoltuttı.
2018 senesi iyülniñ 25-nde ABD devlet kâtibi Mike Pompeo Birleşken Devletler Rusiyeniñ Qırım işğalini iç bir vaqıt tanımaycağına dair «Qırım deklaratsiyasını» derc etti. Pompeonıñ bildirgenine köre, ABD Ukraina topraq bütünliginiñ ğayrıdan tiklenmesini talap etmege devam etecek.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
