Martnıñ 9-nda, salı künü, Aqmescitte ukrain şairi ve yazıcısı Taras Şevçenkonıñ doğğan künü munasebeti ile Kobzarnıñ abidesi yanında Qırımnıñ Ukraina cemiyeti Rusiye teşkilâtınıñ başı Anastasiya Gridçinanıñ reberligi altında tedbir keçirildi. Yigirmige yaqın adam çiçekler qoydı, şiirler oqudı ve yırlar yırladı, dep haber ete Qırım.Aqiqat mühbiri.
Onıñ malümatına köre, tedbirde «ulu ukrain yazıcısı ve ukrain ve ruslar arasında dostluq aqqında» laflar aytılğan. QFU studentleri Taras Şevçenkonıñ «Vasiyet» şiirini ukrain ve rus tillerinde oquğanlar, bediiy aveskârlık iştirakçileri ise kamera ögünde Kobzarnıñ icadınen asla alâqalı olmağan bir qaç ukrain halq oyunını oynağanlar.
Tedbir 15 daqqa devam etken. Resmiy qısmı bitken soñ, istegenler Kobzarğa sayğı köstere bilgen.
Mühbirniñ qayd etkenine köre, Qırım işğal etilgen soñ bu yıllar içinde ilk sefer abide yanında rus polisi ve samooboronasın körünmedi. Şevçenkonıñ büstini ise restavratsiya yapmaq kerek olğanı körüne.
Taras Şevçenko 1814 senesi martnıñ 9-nda dünyağa kelip, edebiyat ve ressamlıq icadı sayesinde meşur oldı. O, ukrain medeniyetiniñ eñ büyük timsallerinden biri ola.
