Ukraina Tış işler naziri Pavlo Klimkin istifağa çıqa, dep bildire Azatlıq Radiosı.
«Vade etkenim kibi, istifa aqqında ariza yazdım. Bazarertesi künü, inauguratsiya künü, onı Yuqarı Radağa ve Ukrainanıñ yañı prezidentine yollaycam. Böyle doğru olur, dep tüşünem. İnsan olaraq doğru yapam. Yahşı siyasiy medeniyet ceetinden doğru, çünki o bizge, nasıl olsa da, kerek», – dep ayttı Klimkin Facebookta aydınlatqan video muracaatında.
O, yañı saylanğan prezident Volodımır Zelenskıyge «kerek olğan yerde ve printsipleri ve baqışlar bir olğan yerde» yardım etmege azır olğanını bildirdi.
«İleri ketem, siyasetke ketem. Ukraina Yuqarı Radasına ketem, elbette, qıymetlerimiz, printsiplerimiz, duyğu ve baqışlarımız bir olğan taqımnen beraber ketem. Qalğanı – soñra», – dep qayd etti Klimkin.
Klimkin Ukraina Tış işler naziri vazifesinde 2014 senesi iyünniñ 19-ndan berli buluna. Tış işler nazirliginiñ yolbaşçısı vazifesine tayin etilecek kişini prezident teklif ete.
Ukraina Yuqarı Radası mayısnıñ 16-nda yañı saylanğan prezident Volodımır Zelenskıynıñ inauguratsiyasını mayısnıñ 20-ne saat 10:00-ğa belgiledi.
