Aprelniñ 16-nda sabağa doğru Kyivge ateş açıldı. Bu aqta paytahtnıñ yolbaşçısı Vitaliy Klıçko bildirdi.
«Şeer çetindeki Darnıtsâ rayonında patlavlar eşitildi. Şimdi o yerde qurtarıcılar ve ekimler çalışa. Zarar körgenler aqqında malümat teşkerile. Daa bir kere er keske muracaat etem: ava telükesi signalını körmemezlikke urmañız», – dep aytıla şeer yolbaşçısınıñ Telegramında.
Klıçko, paytahtqa qaytmağa istegen kyivlilerden şimdilik daa telükesiz yerlerde qalmalarını rica etti.
Kyiv vilâyeti arbiy memuriyetiniñ yolbaşçısı Aleksandr Pavlük bildirgenine köre, Kyiv vilâyetiniñ obyektlerine Rusiye ordusı üç raketa endirdi. Pavlükniñ aytqanına köre, «Kyiv yönelişinde ücüm gruppirovkasınıñ qaytuv telükesi, mayın qoyulğan topraqlar telükesi, Kyiv ve bütün Ukrainada duşmannıñ darbe endirüv imkânları bar».
Ukraina Mudafaa naziriniñ muavini Ğanna Malâr raketa darbeleri telükesi bar, dep ayttı, ve «Kyiv vilâyetini bu gece» Ukrainanıñ eñ sıcaq yerlerinden biri dep adlandırdı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
