Kyivniñ Peçersk mahkemesi dekabrniñ 14-nde gece Mahsus tedbirler quvetleriniñ serjantı, çalğıcı Andrey Antonenkonı apiske aldı. O, jurnalist Pavlo Şeremetni öldürgeninden şübheli sayıla.
Antonenko, fevralniñ 8-ne qadar SİZOda bulunacaq, dep haber ete Azatlıq Radiosı.
Daa evel Pavlo Şeremetniñ öldürilüvi davasınıñ diger şübhelilerine sıñırlav tedbiri belgilendi. Kyivniñ Peçersk rayon mahkemesi ukrain arbiy emşiresi Yana Dugarnı gece-kündüz ev apsine aldı.
Mahkeme, Donbastaki arbiy zıddiyet vaqtında yardım etken bala cerrahı Yuliya Kuzmenkonı fevralniñ 8-ne qadar apiske aldı.
«Ukrayınska pravda» haber resursınıñ jurnalisti Pavlo Şeremet 2016 senesi iyülniñ 20-nde Kyivniñ merkezinde maşina patlavı neticesinde elâk oldı.
Dekabrniñ 12-nde Ukraina iç işler naziri Arsen Avakov, politsiya Şeremetniñ öldürilüvi davasında şübhelilerni yaqaladı, dep bildirdi.
Milliy politsiyanıñ reis muavini – cinaiy politsiya yolbaşçısı Yevğen Koval, şübheliler arasında Mahsus tedbirler quvetleriniñ serjantı Andrey Antonenko, arbiy emşire Yana Dugar, göñülli Yuliya Kuzmenko ve Donbastaki silâlı zıddiyet veteranları İnna ve Vladislav Grişçenkolar bar, dep bildirdi.
