Rusiye Federatsiyasınıñ keçken gece kerçekleştirgen büyük ücümi Kyivniñ kritik infrastrukturasınıñ obyektleri içün eñ ağır oldı, dep bildirdi şeer yolbaşçısı Vitaliy Klıçko.
Onıñ aytqanına köre, Kyivniñ çoq qatlı evleriniñ yarısı – aman-aman 6 biñ – al-azırda Rusiyeniñ büyük ücümi sebebinden qızdıruvsız qala, şeerde suv teminatında problemler bar.
Klıçko paytaht sakinlerine muracaat etip, alternativ aş ve qızdıruv çoqrağı olğan yerlerge barmağa çağırdı.
Kyivde darbe neticesinde dört insan elâk oldı, 25 kişi yaralandı, aralarında ekimler ve qurtarıcılar bar. Şeerde suv ve qızdıruv problemleri bar. Kyiv vilâyetinde akimiyet yıquvlar ve 5 yaralanğan kişi aqqında haber etildi.
Energetika nazirliginiñ malümatına köre, sabasına Kyiv ve Kyiv vilâyetinde 500 biñden ziyade qullanıcı elektriksiz qaldı. DTEK Kyivde 417 000 qoranta ışıqsız qala, dep qayd ete – Desnânskıy, Dniprovskıy, Darnıtskıy ve Ğolosiyıvskıy rayonları sakinleriniñ bir qısmı.
Baş nazir Yuliya Sviridenko haber etkenine köre, İç işler nazirligi, Energetika nazirligi, İnkişaf nazirliginiñ gece ücüminiñ aqibetleri ve yaramay ava aqibetleri aqqında maruzaları diñlenildi, "bu sefer duşman rayon qazanlarına ücüm etti – bu bir energetik terror ve qışnı silâğa çevirmek ıntıluvı".
Ukrayina Silâlı quvetleriniñ Ava küçleri haber etkenine köre, esas nişanı Kyiv vilâyeti olğan darbe içün Rusiye arbiyleri 36 raketa ve 242 (tahminen 150-si – "şahedler") uçucısıznı qullandı. Ukrayina Silâlı quvetleri Rusiye quvetleri tarafından Astrahan vilâyetiniñ Kapustin Yar poligonından orta mesafeli ballistik raketa qullanılğanını tasdıqladı. Arbiylerniñ malümatına köre, ava mudafaası 244 nişannı tesirsiz alğa ketirdi, 18 raketa ve 16 darbe uçucısızı 19 yerge ücüm etti.
Rusiye Mudafaa nazirligi saba Lviv vilâyetine qarşı darbe içün "Oreşnik" orta mesafeli ballistik raketasını qullanğanını tanıp, bunı Ukrayinanıñ Rusiye lideri Vladimir Putinniñ Novgorod vilâyetindeki rezidentsiyasına qarşı ücüminiñ cevabı dep adlandırdı. Ukrayina ve ğarbiy ortaqları böyle bir darbe endirilgenini inkâr etip, Rusiye bu şekilde yañı ücümlerni aqlamağa ve barışıq muzakerelerini sozmağa tırışa, dep bildire.
Ukrayina Tış işler naziri Andriy Sıbiğa darbege cevap olaraq Ukrayina BM Telükesizlik Şurasınıñ acele toplaşuvını, Ukrayina-NATO Şurası toplaşuvını, AB, Avropa Şurası ve OSCE çerçivesinde cevap berilmesiniñ teşebbüsçisi oldı.
