XIII "Kitap Arsenalı" Halqara festivalinde "Serbest Qırımğa mektüpler" teşebbüsi Rusiye akimiyeti tarafından siyasiy sebeplerden mahküm etilgen qırımlılarğa 294 mektüp topladı. Bu aqta iyünniñ 3-nde Ukrayina prezidentiniñ Qırım Muhtar Cumhuriyetindeki Temsilciliginiñ matbuat hızmeti bildirdi.
"Bu sene stend bir qaç müim yönelişni birleştirdi: qırımlı siyasiy mabüslerge qoltutuv mektüpleri yazuz, Qırım mevzusına bağışlanğan neşirlerniñ toplamıile tanışuv ve Qırım milliy eyiallıq fonduna bağış yapma imkânı", — dep aytıla müessiseniñ haberinde.
Bundan da ğayrı, teşebbüs lokatsiyasında 31400 ğrıvnz toplanıldı, o, Ukrayina Mudafaa nazirliginiñ Baş istihbarat idaresi içün pilotsız uçaqlarnıñ satın alınmasına yollanıldı.
2023 senesi çeçek ayında Ukrayinada "Serbest Qırımğa mektüp" aktsiyası başlandı. Onıñ maqsadı — Kremlniñ ukrayinalı esirlerini hatırlatmaq, olarğa destek köstermek. Bundan ğayrı, mektüpler Rusiye apishaneleriniñ memuriyetlerine er bir Ukrayina vatandaşı müim olğanını ve cemiyet olarnıñ apishanede tutuluv şaraitlerini nezaret etkenini köstere.
"Qırım platforması" faaliyetini temin etüv hızmeti reisiniñ muavini Anna Sitnikova, 2024 senesi teşebbüs RF-da qanunsız tutulğan mabüsler içün 1800 mektüp toplağanını bildirdi. ZMINA insan aqları merkeziniñ leyhalar meneceri Viktoriya Nesterenko qoştı ki, 2024 senesi 25 cemaat tedbiri keçirildi, anda insanlar mektüp yaza bile ediler. Kitap forumları, matbuat turları, farqlı şeerlerde körüşüvler oldı.
"Serbest Qırımğa mektüpler" teşebbüsi Ukrayina prezidentiniñ Qırım Muhtar Cumhuriyetindeki Temsilciligi, Ukrayin PEN, ZMINA insan aqları merkezi, Crimea Daily, "KrımSOS", "Qırım esnası" sayesinde çalışa.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
