Qırğızistan Tış işler nazirligi memleketniñ vatandaşlarını Rusiyege barmamağa tevsiye ete. Bu aqta müjçine saytında haber etile.
Qırğızistan Tış işler nazirligi «Rusiyege kirsetmeme aqqında» kütleviy haberler yoq, amma «Rusiye Federatsiyasında şimdiki vaziyetni ve Qırğızistan Cumhuriyeti vatandaşlarınıñ uquqiy vaziyetine tesirini taqip eteler».
«Nazirlik Rusiye Federatsiyasına barmaq içün ciddiy sebepleri olmağan vatandaşlarına qoşma telükesizlik tedbirleri ve devlet sıñırındaki quvetleştirilgen kontrol rejimi lâğu etilgenine qadar anda barmaqtan vaqtınca vazgeçmege, barmağa kerek olsa, Rusiye Federatsiyasına kiriş sıñırlavları barmı dep teşkermege tevsiye ete», – dep aytıla haberde.
Bundan evel Tacikistan Tış işler nazirligi de vatandaşlarını böyle tenbiledi. Müessise vatandaşlarına Rusiyege kirmege sebepsiz izin berilmey, «bu da kütleviy şekilde ola». Aprelniñ soñunda ise memleket Moskva ava limanlarında Rusiyege kirmege tırışqan biñden ziyade vatandaş tutula, dep bildirdi.
Tacikistan ve diger Orta Asiya memleketleriniñ vatandaşları Moskva civarındaki Krokus Siti Holl alış-veriş merkezinde olğan terakttan soñ yañı ksenofobiya dalğasına oğradı. Apiske alınğan dava şübhelileriniñ ekseriyeti – Tacikistan vatandaşları.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
