Ukrainanıñ Suvğa atlama federatsiyası ve Ukraina Gençler ve sport nazirligi Ukraina sportçusı Aleksey Prigorovnıñ Qırımda keçirilgen Rusiyeniñ suvğa atlama boyunca yarışında iştirak etkenini taqbih ete. Bunı Ukraina nazirliginiñ matbuat hizmeti bildirdi.
Bildirüvde: «Ukrainanıñ Suvğa atlama federatsiyası, 2008 senesi Olimpiya Oyunlarında suvğa atlama boyunca tunç medalge nail olğan Aleksey Prigorov bugünki vaziyetine köre milliy cıyma taqımnıñ erkânında bulunmay ve yarışlarda Ukrainanıñ suvğa atlama boyunca cıyma taqımı erkânında iştirak etüvni çoqtan toqtattı, degen malümatnı bildire», – denile.
Bildirüvde, Ukrainanıñ Suvğa atlama federatsiyası ilhaq etilgen Qırımdaki «Crimea Cliff Diving World Cup» yarışında iştirak etmek içün muracaat etmedi ve Prigorovnıñ bu yarışlarda iştirak etkenini taqbih ete, dep işaret etile.
Nazirlikte: «Gençlik ve sport nazirligi, Federatsiyanıñ yanaşuvına qol tuta. Şunı qayd etemiz ki, müessiseniñ böyle allardaki yanaşuvı deñişmeyip qala – Rusiyeniñ arbiy tecavuzı vaziyetinde çportçularnıñ bunıñ kibi areketleri içün iç bir aqlama yoq», – dep ilâve ettiler.
Ağustos 18-de Qırımnıñ cenübindeki Simeiz kurort qasabasında Rusiyeniñ 27 metrlik yükseklikten suvğa atlama boyunca «dünya kubogı» – «Crimea Cliff Diving World Cup» keçti. Onda 12 sportçu iştirak etti. Bu tedbir birinci kere 2017 senesinde keçti.
Qırımdaki yarışta iştirak etkeni içün 2017 senesinde Ukrainağa kirmesi yasaq etilgen britaniyalı sportçu Geri Hant birinci yerni qazandı. Ekinci yer ukrainalı Aleksey Prigorovda, amerikalı Kayl Mitrion üçünci oldı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
