Qırımtatar resurs merkezi kiçik aynıñ 27-nde Qırım işğaline tirenüv Kününe bağışlanğan "Qırım qarşılıq köstere" sergisiniñ açılışını ilân etti. Sergi Ukrayina Tış işler nazirligi, Qırımtatar Milliy Meclisi ve #LIBERATECRIMEA halqara areketiniñ faalleri ile birlikte teşkil etildi.
Sergi, ressam Andriy Yermolenko tarafından yaratıldı. O, informatsion tirenüvniñ bir qısmıdır ve Qırım ilhaqına qarşı küreşniñ 11 yılı devamında yapılğan 15 plakattan ibarettir.
İşler, Rusiyeniñ teşviqatı ve yañlış malümatına qarşılıq köstermek içün zorbalıqsız ve yaratıcı usullarnı qullanğan dünyanıñ çeşit köşelerindeki faallerniñ tirenüvini aks ettire. "Olar bugün de devam etken serbestlik içün küreşniñ bediiy yıllığı olalar".
"Serginiñ maqsadı, Qırım içün küreş toqtatılmağanını ve dünya Ukrayina ve qırımtatar halqınıñ adaletke ıntıluvında destek köstermege devam etkenini qayd etmekten ibarettir. Plakatlar qanunsız işğal, insan aqlarınıñ bozuluvı ve yarımadanıñ azat etilmesi içün küreşte halqara birdemlik aqqında müim mesajlar bere", — dep aytıla QRM-niñ haberinde.
Serginiñ açılışı çerçivesinde ukrayin devlet erbapları ve qırımtatar halqınıñ liderleri çıqışta bulunacaq, olar "halqara birdemlikniñ emiyeti ve işğalge qarşı toqtamağan tirenüv" aqqında fikirlerini paylaşacaqlar.
Sergi Kıyiv vaqtı ile saat 14:30 açılacaq.
Qırımnıñ işğaline tirenüv künü — kiçik aynıñ 26-nda qayd etilgen hatıra künüdir. 2014 senesi bu künü Aqmescitte Qırımtatar Milliy Meclisi tarafından teşkil etilgen Ukrayina topraq bütünligine qoltutuv mitingi olıp keçti. Aktsiya Rusiye işğaline qarşılıq kösterüvniñ esas epizodlarından biri oldı.
2020 senesi Ukrayina prezidenti öz fermanınen içik aynıñ 26-nı Qırım Muhtar Cumhuriyeti ve Aqyar şeeriniñ işğaline tirenüv kösterüv resmiy künü olaraq tasdıqlap, yarımadanıñ Ukrayina suverenitetine qaytarılması içün küreşniñ müimligini qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
