Ukrayina Telükesizlik hızmeti Ukrayina Arbiy Deñiz Quvetleri ile birlikte "Buyan" qanatlı raketalar taşıyıcısı ve "Pavel Derjavin" gemisine ücüm ettiler. Bunıñ aqqında bir sıra ukrayin haber vatsaları hızmetteki menbağa atıf etip bildire.
Haber etilgeni kibi, gemilerge deñev silâ ile deñiz dronları vatsasınen ücüm etilgen.
Rusiye haber vastaları da "Pavel Derjavin" devriye gemisi zarar körgeni aqqında haber eteler. Şu cümleden, RF Mudafaa nazirligine yaqın sayılğan "Rıbar" telegram kanalı saba Aqyar körfezinden çıqqanda Rusiye Qara deñiz flotunıñ gemisi ateşke tutulğanı aqqında haber etti.
Evel Aqyarda küçlü patlav yüz berdi, patlav atta şeerniñ uzaq yerlerinde is etildi, dep bildirgen ediler. Şeerniñ işğal yolbaşçısı Mihail Rzvojayev patlav RF arbiyleriniñ talimleri ile bağlı, dep bildirdi. Aynı zamanda "Krımkiy veter" telegram kanalı deñizde "Buyan-M" lehaysınıñ gemisi patlağanı aqqında bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
