Terrorcılıq qabaatı ile Rusiye quvetçileri tarafından tevqif etilgen kezlevli ressam Bogdan Ziza iyünniñ 5-nde mahkemede soñki sözüni aytacaq.
Uquq qoruyıcı leyhası tarafından yayınlanğan mahkeme oturışlarınıñ ses protokollarına köre, Bogda Ziza oña qarşı kösterilgen terrorcılıq ile bağlı maddelerniñ siyasiy motivleri bar eken.
"Tevqif etilgenimden biraz soñra Aksönov menim davamnı hatırladı ve o, zenaatdaşlarınen laf etkenini dedi, FSB hadimlerini de añıp keçti, bundan soñ ise cezanıñ sertleştirilsine qarar berilgen. İnsan, akimiyet organınıñ temsilcisi olaraq tahqiqatqa tesir etkenini itiraf etti. Bu sebepten davamnıñ siyasiy motivleri olğanını sayam", - dep ayttı Ziza.
2022 senesi mayıs ayında Kezlevli Bogdan Ziza Kezlev memuriyetiniñ binasınıñ fasadında mavı ve sarı boya ve yanıcı qarışmanıñ izleri aşkâr etilgen zaman Rusiye quvetçileri tarafından yaqalandı. Ertesi künü Qırım televizionı kezlevliniñ qırımlılar ögünde "tövbesini" kösterdi. Bu kibi videolar Rusiyeniñ Ukrayinağa qarşı büyük istilâsı başlanğandan berli Rusiye tarafdarı telegram kanalları ve haber vastalarında cenkke qarşı narazılıqlarğa açıq takbih kibi sıq-sıq rastkelinir. Bogdan Zizanıñ yaqınları onıñ üzerinde bedeniy küç qullanğanına dair alemetlerni körip, onıñ iskencege ögratılması ihtimalınıñ olğanını bildirdiler. Tutulğan soñ Bogdan Zizanı başta "Rusiye silâlı quvetlerini itibardan tüşürgeni" içün para cezasına mahküm ettiler, soñra tevqif ettiler. O vaqıttan berli o SİZO-da buluna. Bogdan Rusiye Ceza qanunnamesiniñ üç maddesine binaen qabaatlana. Qabaatlavlar arasında terrorcılıq da bar, bunıñ içün o 15 yıl apis cezasına mahküm etile bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
