«Suspilne Krım» yayınlayıcısı Kezlevde de patlavlar aqqında bildirdi. «Saat 22-de şeerde bir qaç küçlü patlav eşitildi. Kökte uçaqlar eşitildi. Alçaq ve sesli uçqanlar», – dep tarif etti Kezlev sakini.
Qırımnıñ Telegram kanalları uçucısızlarnıñ ücümi aqqında haber ete. Dronlar Sarabuz, Novofedorovka ve Saqta ve Aqmescit rayonında qayd etildi.
Rusiye akimiyeti vaziyetni şimdilik izaatlamadı, ava telükesi ilân etilmedi.
Berilgen malümatqa köre, Kefede oktâbrniñ 7-ne keçer gecesmi patlavlar oldı, Qırımnıñ Rusiye yolbaşçısınıñ mesleatçısı Oleg Krüçkov cermay bazasında yanğın çıqtı, dep bildirdi.
«Kefe cermay bazasında yanğın. Fevqulâde vaziyetler nazirligi çalışa. Ölgen ve yaralanğanlar yoq», – dep yazdı Krüçkov.
«Krımskiy veter» Telegram kanalı Saq, Aqmescit ve Qurman rayonlarında patlavlar aqqında bildirdi.
Kefede yanğan cermay bazası – AO «Morskoy neftânoy terminal» – Qırımda cermay malları miqdarına köre eñ büyük ola.
2024 senesi mart ayında oña Ukrayina Silâlı quvetleriniñ dronları ücüm etti, o vaqıt yaqarlıq ketken magistral boru zarar körgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.