Qırımda COVID-19 diagnozı qoyulğan qadın vefat etti. Bu aqta Qırımnıñ Rusiye Sağlıq nazirliginiñ saytında haber etile.
Nazir muavini Anton Lâskovskiyniñ malümatına köre, qadın Kezlev şeer hastahanesinde bulunğan edi.
«Keçken künü bir kişi vefat etti – Kezlev şeer hastahanesiniñ reanimatsiyasında bulunğan hasta vefat etti. Ciddiy baş yarası ve bir qaç hronik hastalığınen qabul etildi», – dep bildire Lâskovskiyniñ aytqanlarını Rusiye ükümetine yaqın «Krıminform» resursı.
Berilgen malümatqa köre, Qırımda bir künde beş yañı COVID-19 hastası qayd etildi.
Qırımda 613 koronavirus hastası qayd etildi, 21 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
