Sentâbrniñ 14-nde saba uçucısızlarnıñ ücümi ve patlavlardan soñ Kezlev azbarlarından birinde dron tüşti, dep haber ete Qırım ve Rusiye Telegram kanalları.
«Krımskiy veter» Telegram kanalı bildirgenine köre, uçucısız Demışev soq., 127A adresinde bank ve ev arasında tüşti. Rusiye uquq qoruyıcıları azbarnı sarıp aldı. Zararlar ve yaralanğanlar aqqında haber etilmey.
«Suspilne» Telegram kanalı bir foto derc etti, tahminlerge köre, fotoresimde tüşken uçucısız körüne.
Sentâbrniñ 14-nde saba Kezlev, Zaozernoye ve Uyutnoye sakinleri küçlü patlavlar aqqında bildire.
Bundan ğayrı, saat 5:13-te Rusiye akimiyeti Keriç köpründe areketni qapattı.
Rusiye Mudafaa nazirligi Rusiye ava mudafaası Qırımda uçaq çeşitli 11 uçucısıznı urıp tüşürdi, dep bildirdi. Ücüm tafsilâtları aydınlatılmay. Rusiye arbiyleri Ukrayınanı qabaatlay, Ukrayına akimiyeti şimdilik bir izaat bermedi. Bu malümatnı mustaqil menbalardan tasdıqlamaq imkânsız ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
