Sentâbrniñ 14-ne keçer gecesi Kezlev yanında Ukrayına telükesizlik hızmeti ve Ukrayına arbiy deñiz quvetleri mahsus operatsiyanı keçirip, «Triumf» Rusiye ava mudafaa kompleksini yoq etti, dep bildirdi Azatlıq Radiosına Ukrayına telükesizlik hızmetindeki menbalar.
Kompleks fiyatı 1,2$ milliard qadar ola bile. Ukrayına telükesizlik hızmetiniñ uçucısızları başta radar ve antennalarğa ücüm etti. Radiolokatsion stantsiyalarnı işten çıqarğan soñ Arbiy deñiz quvetleriniñ bölükleri eki «Neptun» qanatlı raketalarınen komplekske darbe endirdi.
Ukrayına şimdilik bunı tasdıqlamadı, Rusiye bu aqta bildirmey.
Sentâbrniñ 14-nde saba Kezlev, Zaozernoye ve Uyutnoye sakinleri küçlü patlavlar aqqında bildire. saat 5:13-te Rusiye akimiyeti Keriç köpründe areketni qapattı.
Rusiye Mudafaa nazirligi Rusiye ava mudafaası Qırımda uçaq çeşitli 11 uçucısıznı urıp tüşürdi, dep bildirdi. Ücüm tafsilâtları aydınlatılmay. Rusiye arbiyleri Ukrayınanı qabaatlay, Ukrayına akimiyeti şimdilik bir izaat bermedi. Bu malümatnı mustaqil menbalardan tasdıqlamaq imkânsız ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
