Kezlev, Yalta ve Kefede Ukrayınağa qoltutuv risaleleri peyda oldı, dep haber ete «Jovta striçka» Ukrayına areketi Telegram kanalında.
«Faallerimiz Ukrayına graffitisi yapmağa, Ukrayına risalelerini tarqatmağa, sarı şeritler baylamağa devam ete. Raşistlerge Qırım Ukrayına olğanını hatırlatamız», – dep aytıla haberde.
Teşkilâtnıñ malümatına köre, umumen soñki afta devamında faalleri 500-den çoq risale tarqattı. Er kün anda areketke qoşulmağa istegenlerniñ yañı muracaatları kele.
İşğal etilgen Qırım sakinleri faallikte liderlerden birileri ola, dep aytıla haberde.
«Jovta striçka» Ukrayına areketi bildirgenine köre, «vaqtınca işğal etilgen Qırımda vatandaş tirenüvi quvetlerini arttıra». Teşkilât, yarımadada Ukrayına areketiniñ aman-aman 1000 faali buluna, dep qayd ete.
Qırım ve Aqyarda Rusiyeniñ Ukrayınağa qarşı istilâsına qarşı çıqqanlarnı taqip etmege devam eteler. Noyabr ayında «KrımSOS» aq qorçalayıcı teşkilâtı bildirgenine köre, 9 ay devamında Qırımdaki Rusiye mahkemeleri Rusiye ordusını «itibardan tüşürüvnen» bağlı 200-den çoq memuriy davanı baqtı.
Ukrayına prezidentiniñ Qırım Muhtar Cumhuriyetindeki daimiy temsilcisiniñ muavini Denis Çistikovnıñ soñki malümatına köre, Qırımda Rusiye Federatsiyasınıñ ordusını «itibardan tüşürüv» sebebinden 170-ten çoq insan mesüliyetke çekildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
