Kezlev ve Qırımnıñ daa beş rayonı çeçek ayınıñ 2-nde saba magistral ağlarda "tehnologik aqsamalar" sebebinden qısmen elektriksiz qaldı. Bu aqta yerli vaqıtnen saat 8:33 "Krımenergo" rus müessiseniñ matbuat hızmeti bildirdi.
"Magistral ağlardaki tehnologik aqsamalar sebebinden Qırım Cumhuriyetiniñ Kezlev, Saq, Aq Şeyh, Curçı, Aqmeçit, Or Qapı rayonlarınıñ qullanıcıları elektriksiz qaldı", — dep aytıla haberde.
Şirket üç saat içinde elektrik teminatını qaytarmaqnı vade etti. "Tehnologik aqşamalar" sebebi ne olğanını "Krımenergo"da aytılmadı.
"Krımenergo" energetik şirketi öz telegram kanalında şunı haber etti: "Magistral ağlarda tehnologik aqsamalar sebebinden Canköy, Qurman, Büyük Onlar, Curçı, Aqmeçit, Or Qapı, Ermeni Bazar, Saq, Aq Şeyh rayonlarınıñ qullanıcıları elektriksiz qaldı.
Tam kölemli cenk şaraitinde Qırım.Aqiqat muarririyeti bu malümatnıñ kerçekligini ve tolulığını tasdıqlap olamay.
2022 senesinden başlap, Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.