Kezlevniñ Rusiye memuriyeti yolbaşçısı Andrey Filonovğa qarşı cinaiy iş açıldı, dep bildire Rusiye ve Qırım kütleviy haber vastaları Qırım ve Aqyardaki Rusiye FSB idaresiniñ matbuat hızmeti bergen malümatqa esaslanıp.
«Qırım ve Aqyardaki Rusiye FSB idaresiniñ Tahqiqat bölügi Rusiye Ceza kodeksiniñ 286-ncı maddesiniñ 3-ünci qısmına istinaden (ağır aqibetlerge ketirgen vazifesinden tış areketler) Kezlev şeer memuriyetiniñ yolbaşçısına qarşı cinaiy iş açtı», – dep bildire kütleviy haber vastaları FSB idaresiniñ malümatını.
FSB idaresiniñ bildirgenine köre, aprelniñ 3-nde şeer yolbaşçısı yaşağan yerde, yerli memuriyette ve diger adreslerde tahqiqat tedbirleri keçirile.
Uquq qoruyıcılar Kezlev memuriyetiniñ binasında ve Andrey Filonovnıñ iş odasında tintüv keçire, dep bildire TASS Rusiye haber agentligi Kezlev Rusiye şeer şurasınıñ reisi Olesâ Haritonenkonıñ malümatına esaslanıp.
Tünevin Andrey Filonov şeer şurasınıñ onı işten boşatmaq qararı aqqında bildirdi.
2018 senesi oktâbr ayında Kezlev prokurorı Aleksandr Moşegov şeer şurasına şeer memuriyetiniñ yolbaşçısı Andrey Filonovnıñ habarcılıq areketlerinden sebep işten boşatılacağını aydınlatqan edi. Filonovnıñ aytqanına köre, prokuror areketiniñ sebebi ömür arqadaşınıñ babasını Kezlevniñ belediye müessiselerinden biriniñ reberi olaraq tayin etüvi oldı.
