Eger küçlü bir zelzele olsa, Keriç boğazı üzerindeki köpür yıqıla bile. Bunı Qırım.Aqiqatqa Ukraina Milliy ilimler akademiyasınıñ Subbottin adına Geofizika institutınıñ müdir muavini Aleksandr Kendzer ayttı.
“Zelzeleviy tetqiqatlar yardımınen mesken evlerde ve diger obyektlerde, şu cümleden Qırımnı Rusiye ile bağlağan köpürde, zelzele olğan taqdirde vaziyetni tahmin etmek mümkün. Köpürniñ tübünde eki tektonik plita arasındaki sıñır keçe. Bu plitalar areket ete ya da bir-birine nisbeten aylana bile. Bu vaziyette küçlü zelzeleler ola. Anapada yüz bergen yerastı sarsıntılar, küçlü zelelzelelerniñ baş bere bilecek faal strukturalarını köstere”, – dedi alim.
Evel, yanvarnıñ 11-den 12-sine keçer gecesi Yaltada üç dereceni teşkil etken yerastı sarsıntılar yüz bergeni aqqında haber etilgen edi.
Ukraina Tış işler naziriniñ birinci muavini Emine Ceppar AB daimiy vekiller komitetine Ukraina topraq bütünligini ve suverenitetini bozuv, hususan Keriç köprü qurucılığı ile bağlı şahıs ve teşkilâtlar cedvelini kenişletmek qararını qabul etkeni içün teşekkürler bildirdi.
AB elçileri Keriç köprüniñ qurucılığı içün eki şahıs ve dört şirketke qarşı sanktsiyalarnı tasdıqladı.
Daa evel berilgen malümatqa köre, Qıbrız Keriç köprü qurucılığı sebebinden kirsetilgen Avropa Birligi sanktsiyalarını blok ete. AB, bu köpürni qurğan şirketlerge qarşı sanktsiyalarnı 2018 senesi iyül ayında kirsetti.
İyünniñ 18-nde Ukraina Tış işler naziri Dmıtro Kuleba bildirgenine köre, Avropa Birligi Şurası Qırım işğali sebebinden Rusiyege qarşı sanktsiyalarnı bir yılğa uzattı.
Sanktsiyalar 2014 senesi Rusiyeniñ yarımada işğaline cevap olaraq kirsetildi. O vaqıttan berli bir qaç kere uzatılıp kenişletilgen edi.
Keriç boğazındaki köpürniñ maşina qısmı 2018 senesi mayıs ayında yengil maşinalar içün açılğan edi, daa soñra yük maşinalarınıñ areketi başlatıldı. Köpürniñ demiryol qısmı daa azır degil.
2019 senesi dekabr ayında Rusiye prezidenti Vladimir Putin köpürniñ tren areketini başlattı.
Ukrainanıñ beşinci prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
