Dekabrniñ 6-nda saba bir sıra Qırım Telegram kanalı işğal etilgen Keriçte patlavlar olğanını bildirdi.
«Krımskiy veter» kanalınıñ malümatına köre, «Zaliv» gemi qurucılıq zavodı tarafında patlavlar eşitildi, «Arşintsevo» mikrorayonında nasıldır qızarıntı körüne».
Rusiye saifeleri Keriç boğazında ava mudafaası çalışa, dep haber ete. Berilgen malümatqa köre, bu rayonda deñiz dronları bar.
Rusiye Mudafaa nazirliginiñ esabatına köre, Qara deñizde Qırım yarımadasına ketken eki deñiz dronu yoq etildi.
Qırım.Aqiqat oquyıcıları Keriçte patlavlar aqqında malümatnı tasdıqlay. Qayd etilgenine köre, 10-20 daqqa aranen üç patlav oldı – ilk ekisi darbe seslerine oşadı, bir danesi – ava mudafaa sistemasınıñ işine.
Birinci patlav saba saat 7-lerde eşitildi. Keriç köprü ve «Zaliv» zavodı tarafından ses keldi.
Muarririyet bu malümatnı tasdıqlap olamay. Ukrayina tarafı malümatnı izaatlamadı.
Qırım.Aqiqat Rusiye tarafınıñ beyanatını tasdıqlap ya da teşkerip olamay. 2022 senesinden başlap yarımada aman-aman er kün uçucısız ve raketalarnıñ ücümine oğray, çoqusı alda Rusiye Federatsiyasınıñ Mudafaa nazirligi ya da Rusiye akimiyeti, bu malümat olsa da, arbiy obyektlerge darbe endirilgenini tasdıqlamay.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
