Keriçniñ Rusiye akimiyeti Vokzalnoye şosse rayonında 10 insannı tahliye etti, dep haber ete şeerniñ Rusiye memuriyetiniñ matbuat hızmeti.
«Keriçteki Vokzalnoye şossesinde suv basqan yerlerden 4 bala olğan 10 insan tahliye etildi. Tahliye etilgenler Voykov, 30 adresindeki bala sanat mektebinde açılğan vaqtınca tutuv noqtasında buluna. Olarnı musafirhanelerge yerleştirüv ve aşatuv meselesi çezile», – dep aytıla memuriyetniñ «VKontakte» saifesindeki haberinde.
Keriçniñ Rusiye memuriyeti şeerniñ alçaq rayonlarında yaşağan sakinler tahliye etilse, toplaşacaq noqtalar aqqında bildirdi.
Keriç yolbaşçısı vazifelerini vaqtınca eda etken Svâtoslav Brusakov Keriçniñ alçaq rayonlarında yaşağan sakinlerni tahliyege azır olmaq kerek, dep tenbiledi.
Qırımnıñ Yedi Quyu rayonında sağanaqlar neticesinde Melek Çeşme özenine kirgen Qıdırlez özeni suv toldı. Qırım.Aqiqat mühbiriniñ bildirgenine köre, Qıdırlez özeniniñ furtunalı aqımı Keriç tarafına kete. Yedi Quyu rayonındaki Qıdırlez özeni şeer stadionı rayonında Melek Çeşmege kire.
Küçlü yağanaqlar neticesinde Keriçniñ merkeziy soqaqlarını suv bastı.
Daa evel berilgen malümatqa köre, Qırımnıñ şarqındaki Köp Kenegez (Krasnogorka) köyünde sağanaqlar neticesinde 170 azbarnı suv bastı.
Qırımdaki Rusiye Fevqulâde vaziyetler nazirliginiñ idaresi avgustnıñ 13-ne, 14-ne furtuna ihtarını ilân etti – yarımada şarqında ava bozulacaq, dep tahmin etile.
Qırımlı sinoptiklerniñ malümatına köre, şarqiy Qırımnıñ yaoısında avgustnıñ 13-nde eki metrlik dalğalar olacaq.
«Fobos» Rusiye ava merkeziniñ mütehassısı Yevgeniy Tişkovetsniñ bildirgenine köre, Qırımda sağanaqlar sebebinden «Nuh tufanı» beklenile.
