İyünniñ 29-ı itibarınen Keriçte 128 kişi vaqtınca qaluv noqtalarında yaşamağa devam ete, dep haber etti şeerniñ Rusiye başı Sergey Borodin.
«Vaqtınca qaluv noqtalarında 128 adam yaşamağa devam ete, olardan 27 bala. Aqibetlerniñ yoq etilüvine 1877 insan ve 84 tehnika celp etilgen», – dedi Borodin Yaltada operativ ştabnıñ oturışında.
Onıñ bildirgenine köre, bugünde endi 776 adam tazminat alğan, ödemeniñ umumiy miqdarı 74 million 4200 biñ ruble.
Aksönov Qırımda sel neticesinde zarar körgenlerniñ arizaları iyülniñ 1-ne qadar qabul etile, dep bildirdi.Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.
Rusiye prezidenti Vladimir Putin Qırımğa afat aqibetlerini yoq etmek içün «acele ve büyük» yardım köstermege emir etti.
